في 1995 ماك آرثر ويلر دار عملية صطو لجوج البنوك بدون ميخبي الوجه ديالو و بدون خوف و بكل ثقة في النفس سرق البنوك و خرج و هو كيشوف في كاميرات المراقبة وكيبتاسم ههههه 

الغذ غدي يتشد صديقنا و غدي يعرضو عليه الفيديوات لي كتبت السرقة ديالو خونا تفاجئ و قاليهم ميمكنش راني دهنت وجهي بعصير الليمون ههههه 

صديقنا يسحاب راسو مغديش يبان ملي يدهن وجهو بعصير الليمون  

مثال آرثر لي سرق البنوك وبكل ثقة هو مثال ديال يزااف ناس 

جميعا كنعرفوا أشخاص لي كتسوليه قبل الامتحان كتلقاه خايف و متايقش في القدرات ديالو على أنه غدي ينجح كيبرياري و يعاود و يسهر الليل وتسوليه يقوليك ماشاد والو 

 و في الطرف الثاني كايين شي وحدين لي تايقين بزااف و عند بالو حافظ و فاهم مزيان كتلقاه هو باغي يشرح لعباد الله هههههه

و ملي كنجيو نشوفو نهار النتائج كنلقاو ان الانسان لي كان متايقش في راسو و كيجتاهد هو لي توفق و جاب أحسن نقطة 

أما صديقنا لي داخل و موهم راسو وتايق و داير فيها راه نيوتن سقط 

هنا كيبان لينا أن وهم الثقة هو السبب لي كيخلينا اللور و كسلاء و مكنحاولوش نديرو مجهود أو نتعلمو مهارات جديدة في حين ان الناس لي ما تيقينش في معلوماتهم

 و دائما كيحاولو يطورو راسهم و يتعلمو و عندهم شك في المعلومات ديالهم هنا غدي نعطيك خيارين يا إما ما تيقش في معلوماتك و تجتهد و طور راسك و لا تيق في راسك وتوهم راسك أن عارف و نتا معارف والو 

الحلول : 

 أولا ؛ خاصك تقدير الذات و احترام الذات وليس الثقة في النفس لأن النفس البشرية مافيهاش ثقة حيث متقلبة تخيل ان الرسول عليه الصلاه والسلام قال على النفس اللهم لا تكلني الى نفسي طرفة عين و أن النفس أمارة بالسوء و أغلبية علماء التحليل النفسي مكيتكلموش على شي حاجة سميتها الثقة في النفس هادشي كاين غير في دوك الخطابات الرنانة ديال السوشيل ميديا و انما كيتكلمو على تقدير الذات و احترام الذات وتطويرها 

ثانيا : هادي نقطة مهمة خاصك تعرف أنك بشر ولست إله تقبل الخطأ و تقبل الضعف و تقبل الفشل وعرف عمرك غدي تعلم الا مخطأتيش و عمرك غدي تنجح الا ما فشلتيش لأن قبول الخطا صواب و قبول الضعف قوة وقبول الفشل نجاح 

ثالثا ؛ خاصك تعرف أنك كتستحق أي حاجة في هاذ الحياة كتستحق الحب الاهتمام الاحترام و كلشي و أن الله قال و لقد كرمنا بني ادم خاصك تعرف أن هاذ التكريم يستحق منك الشكر والتقدير واخا ما دير حتى انجاز أو نجاح في حياتك 

رابعا : حيد منك الاحساس بالذب و بدليه المسؤولية أي خطأ درتو نتحمل المسؤولية ديالو طحتي في مشكل قول أنا المسؤول عليه أنا السبب ونعالج المشكل و مرة الجايا نتفاداه حول دائما تشك في معلوماتك حاول طور من المهارات ديالك و تعلم و بحث